Iaz, Ulma Challengeko lehenengo edizioa Bergara eta Oñati artean antolatu zuten, eta oraingoan Oñatin batuko dira bi probak. Izan ere, Euskal Herri mailan ez dago kadete eta junior mailetako ziklistendako halako ezaugarririk duen probarik. "Eta garrantzitsua da halakoak egotea, bereziki emakumezkoetan ez gaudelako horrenbeste ziklista, eta ikusgarritasuna ematen laguntzen dute", adierazi dio GOIENAri etxean lehiatu ahal izango den Igamo Packaging taldeko ziklista Maddi Oleagak.
Bi kilometroko igoera
Esan bezala, goizean erlojupeko proba izango dute –1,9 kilometro–. Ziklistak herrigunetik Garagaltza auzoraino igoko dira. "Tartean badaude malda gogorrak, baina baita errekuperatzeko tarteak ere, eta estrategiak pisua izan dezake". Eta arratsaldean 62 kilometroko lasterketa izango dute: "Oñati eta Bergara artean pare bat joan-etorri egingo ditugu, eta bietan Santipillauko maldak igoko ditugu. Bigarren igoera erabakigarria izango da".
