Hirugarrenez antolatu dituzte Debagoieneko haur eta gazte abesbatzen topaketak. Maiatzaren 5ean izango da aurtengo edizioa, Oñatiko Santa Ana antzokian, 19:00etan. Ganbara Faktoria da ekimenaren antolatzailea, eta "helburua Debagoieneko hainbat herritako abesbatzak gonbidatzea da, bakoitzak bere lana eta ondoren lan bateratua eskaintzeko". Ganbara Faktoriaren ustez, geroz eta haur abesbatza gutxiago daude, eta, horregatik, beharrezkotzat dituzte horrelako ekimenak.
Zazpi abesbatza elkartuko dira topaketetan: Oñatiko Ganbara Txiki abesbatza, Ganbara Txikitxo abesbatza eta Ikastetxeak Kantari, Aramaioko Papargorri Abesbatza, Arrasateko Goikobalu Txiki, Bergarako Orfeoi Gaztea eta Donostiako Easo Txiki abesbatza; izan ere, topaketa horietan ohitura da Debagoienekoa ez den abesbatza bat ere gonbidatzea; horrenbestez, hura izango da aurten abesten.
Sarrerak Oñati.eus atarian edo Txokolaterixan eskuratu daitezke.
