Goiz "polita" igaro dute, zuhaitzak landatzera animatu diren oñatiarrek. 40-50 lagun inguru bildu dira gaur, Unaimendi inguruan zuhaitzak landatzera; ostean gurutzera igo eta Aloña Mendiko pankarta batekin argazkia atera dute.
Natur Eskolak Aloñako Lagunekin batera antolatutako ekimena izan ohi da normalean, aurten baina hirugarren parte hartzaile bat batu zaie: Aloña Mendiko Kirol Elkartea. Kirol Elkartearen 75.urteurrena dela eta batu dira ekimenera, eta honekin batera itxi da zuhaitz landaketaren zikloa.
Helburua beteta
"Aurtengoa izan da Oñatin egingo den azken zuhaitz landaketa", hala adierazi du Aimar Uribesalgok, Natur Eskolako kideak. "Hogeita hiru bat urtetan zuhaitz sail asko landatu dira, eta muga bat ezarri behar da, ez da komeni Aloña inguru guztia zuhaitzez betetzea", azaldu du Natur Eskolako kideak. "Artzaintza eta abeltzaintza gune bat da eta gure helburua inoiz ez da izan baso bat sortzea, abereentzako udan gerizpe guneak eta neguan hotzetik eta elurretik babesteko tokiak egitea zen gure helburua", gaineratu du.
