Oñatiko alderdi jeltzaleak jakinarazi duenez, Gipuzkoako Foru Aldundiarekin harremanetan jarri da Oñati eta Elorregi artean lanzaderak jartzeko. Horixe proposatuko dio eskatutako bileran. Jeltzaleen esanetan, proposamen horrek Oñati eta Elorregiko geltokiaren arteko lotura hobetzea du helburu, baita "Oñatik Lurraldebuseko autobus-linea nagusiekin duen konexioa samurtzea eta Debagoienako udalerriekin zein hiriburuekin duen lotura hobetzea ere".
Garraio publikoaren konexioa hobetzea "Oñatiko beharrizan handia" dela ikusita, jeltzaleen iritziz, "autobus-anezka jarriz gero, Lurraldebuseko autobusen ibilbide nagusiekiko konexioa erraztuko da batetik, eta, bestetik, aurrerapauso garrantzitsua izango da Oñatiko herritarrek garraio publikoa eskuragarri izan dezaten, beste herritar askok duten moduan". Ekimen hori bailaran mugikortasun iraunkorra sustatzeko "funtsezkoa" dela ere badio Oñatiko EAJk prentsa oharrean, "ibilgailu pribatuekiko mendekotasuna murriztuz eta garraio publikoaren erabilera bultzatuz".
