Bartzelonako zazpigarren Nit de la imatge subterrània (Lur azpiko irudien gaua) jaialdian hartu du parte asteburuan Aloña Mendiko espeleologia taldeak Zuloan zu? dokumentalarekin eta lehen saria irabazi du. "Beti egoten da esperantza, txikia bada ere, baina sorpresa izan da, bai. Oso pozik gaude", dio AMETeko Santi Ugartek.
Herrialde ezberdinetako hamaika ikus-entzunezkoren emanaldiek osatu dute aurtengo egitaraua. Zapatuan, hilak 13, 17:00etatik 22:00etara eskaini zituzten lanak Bartzelonako Sant Pere 1982 aretoan eta publikoak bere bozka eman zuen amaieran.
Arantzazuko leize-zuloko irudiak
Oñatin Egindako Espeleologia filma da Zuloan Zu?. Arantzazuko leize batean izandako azken esplorazioak eta ustekabeak erakusten ditu lan horretan Aloña Mendi Espeleologia Taldeak. Dokumentala, azaroan Aloña Mendiko mendi sailak egin zuen mendi hamabostaldiaren barruan estreinatu zuten.