Arratsaldeko 16:30erako zuen antolatuta Antxintxiketan kirol elkarteak 2023 urtea agurtzeko San Silbestre lasterketa herrikoia, eta ordu horretan abiatu dira aurrez izena eman duten 401 korrikalari. Inoizko jendetsuena izan da aurtengoa. Antolatzaileek ere inprobisatu egin behar izan dute; 360 lagunendako zituzten prestaketak eginda. Ehuneko handi bat, gainera, "%90etik gora" antolatzaileen esanetan, oñatiarrak izan dira.
Eric Martin (23' 09'') eta Xabier Luis (24' 13'') berehala jarri dira aurrean, eta horrelaxe bukatu dute zazpi kilometroko lasterketa; gizonezkoetan hirugarren azkarrena Mikel Ruiz (24' 43'') izan da. Hirurak oñatiarrak. Emakumeetan berriz, behetik gora egin du Miren Josune Bikuñak 8(29' 09''), eta lehen postuan sailkatu da. Ane Zabala (29' 36'') eta Nagore Uribarri (29' 51'') izan dira hurrengo bi neskak. Arrasatearra da Zabala, podiuma egin dutenen artean oñatiarra ez den bakarra. Izan ere, beteranoen sariak beste bi oñatiarrek jaso dituzte: Elena Mugarzak eta Mikel Korkostegik. Zortzi sari horiez gain, beste bost otar zozkatu dituzte parte-hartzaileen artean.
Nagusien lasterketaren aurretik, hamalau urtetik beherako gaztetxoek egin dute korrika. Kategoriaka, bakoitzari dagokion beste buelta eman dizkiote plazari.
Antolatzaileek eskerrak eman dizkiete bai parte hartu duten korrikalariei, bai modu batera edo bestera antolaketa lanetan lagundu duten guztiei, herriko hainbat babesle tartean.
