Ohitura da honezkero Oñatin musikaren bueltako hainbat taldek kontzertua eskaintzea Gabonen atarian, eta horrelaxe egin dute gaur ere Oñatiko Musika Bandak eta Banda Gazteak eta Ganbara, Hots eta Oñati abesbatzek Zubikoa kiroldegiko frontoian.
Hator hator 2023 izenpean askotariko kantuak jo eta abestu dituzte. Aitor Biainen zuzendaritzapean, esaterako, Otto M. Schwarzen Nostradamus pieza jo dute kontzertua hasteko Musika Bandakoek, baita Home Alone Christmas ere. Hots eta Ganbara abesbatzen txanda etorri da gero. Bakoitzak bina kanta abestu ditu, denak ere Aitor Biainek zuzenduta eta Amaia Zipitria piano-jotzaileak lagunduta. Oñati abesbatzaren kasuan, Miren Gurutze Plazaola izan da zuzendari lanetan aritu dena, eta Arantzazu Sainz pianoa jo duena.
Emanaldia bukatzeko, denak batera igo dira agertokira Johann de Meijen African Harmony jo eta abesteko. Eta txalo zaparradei kasu eginez gero, Zubikoako frontoiko harmailak ia guztiz bete dituzten herritarrak gustura geratu dira entzun dituztenekin. Esan, era berean, kontzertua doakoa izan den arren, Oñatiko Misio Taldeak borondatezko ekarpenak jaso dituela dituen proiektuetan laguntzeko.
