Musikegunak egitasmoaren barruan, Gabriel Arestiren poemen berrinterpretazioa egingo dute. Hain zuzen, Arestian, egun...! emanaldia eskainiko dute Andoni Salamero olerkariak, Andoni Egaña bertsolariak eta Aitor Furundarena musikariak domekan 19:00etan hasita, Santa Ana antzokian. Salameroren hitzetan, proiektu "berritzailea" eta "eraldatzailea" da domekan egingo dutena: "Guk ez dugu nahi soilik Arestiren poemak irakurri. Bizi izan zituen garai zail horiek olerkien bidez adierazteaz gain, musika eta bertsoen bidez, hura hunkiarazi zuten gaiak –euskara, justizia, kultura, egia, klase sozialen bereizketa eta euskararen batasuna– egun bizi dugun egoerarekin konparatu nahi ditugu".
Olerkia, bertsoa eta musika
Andoni Salamero olerkariarekin batera batu dira proiektura Andoni Egaña bertsolaria eta Aitor Furundarena musikaria. Bakoitzak menperatzen duen diziplinatik Aresti nor zen "erakutsi" nahi dutela azpimarratu du Salamerok: "Argi dago poesiak eta hitzek indarra hartzen dutela eta ardatza behar dutela izan, baina bertsolaritzak ere zentzu profetiko bat hartzen du, eta adi-adi jarraitzen diogu bertsolariak dioenari. Musikaren kasuan, Aitor bezalako musikari batek aukera ematen dizu garai horietako doinuen errekreazioa egiteko, eta, era berean, musikak goxatzeko eta hitzaz gain adierazteko gaitasuna du".
Hori guztia osatzeko emanaldia lau zatitan banatzen dute: 1936, 1955, 1975, eta 2025 eta etorkizuna. Kasu bakoitzean, sortzaile bakoitzak, bere "gaitasunei jarraituz", Arestiren "berrinterpretazioa" egingo duela gaineratu du Salamerok, eta Oskorrik eta beste sortzaile batzuek musikatutako abestiak baliatuko dituzte ekitaldia girotzeko.
Estreinaldia, Oñatin
'Arestian, egun...!' emanaldiaren estreinaldia izango da Santa Ana antzokikoa. Salamerok dioenez, "labetik atera berria" den emankizuna eskainiko dute domekan, eta ilusio "berezia" egiten diela ere azpimarratu du: "Mimo handiz eta atseginez landu dugun lana da aurkeztera goazena. Pozik gaude Musikegunak egitasmoan aurkezteko aukera izango dugulako; izan ere, bide emango du jendeak lehen aldiz ikusteko, eta antzokian bertan gozatu ahal izateko". Ikustera joan nahi duenak sei euro ordaindu beharko ditu, eta sarrerak Udalaren web orrialdean eta Txokolateixan daude eskuragarri.
