Hiru eskakizun nagusi egingo dira manifestazioarekin. Lehena, Estatu Palestinarra aitortzeko eskaera. "Palestinaren eta Israelen arteko gatazkari behin betiko konponbidea emateko asmoz, Nazio Batuen Erakundeak (NBE) proposatutako Estatu bien konponbidearen logikan oinarrituta. Proposamen horrek nazioarteko komunitatearen gehiengoaren babesa du, baita aktore palestinar gehienena ere (PAN, Hamas,...)", azaldu dute deitzaileek.
Bigarrena, Israelen okupazioarekin amaitzea. "Lurralde Palestinarren okupazioarekin amaitzea eskatzen dugu. NBEren Segurtasun Kontseiluaren 242. Ebazpenak jasotzen duen moduan. Lurralde horietan Israelek daraman kolonizazio prozesuarekin amaitzea ere eskatzen dugu".
Eta hirugarrena eta azkena, erasoekin amaitzea: "Eraso guztiekin eta baita Gazaren aurkako blokeo ororekin ere amaitzea eskatzen dugu".
Manifestazioari babesa
Atxikimendua erakutsi dute herriko hainbat eragilek: ELA, LAB eta Steilas sindikatuak; EH Bildu; Sortu; STH mugimendu ekologista; Sare Feminista; Bargastak; Ernai; Antixena gazte asanblada; Pentsionisten Duintasuna elkartea; Gure Bazterrak elkartea; Hotz Oñati; Sare; Askapena; IKAMA; eta Txinparta bertso eskola. Horrez gain, deialdiarekin bat egin dute hainbat auzotako jai batzordeek, herriko musika taldeek eta beteranoen futbol taldeak. Are gehiago, baita ehundik gorako herritarrek ere; tartean dira, besteak beste, Mikel Biain alkate ohia, Malen Osa eta Asier Alonso mendi lasterkariak, Felipe Uriarte mendizalea eta Markel Irizar txirrindulari ohia.
