Foruen Plazatik abiatuta egin zuten Potx eta Lotx pailazoek lagunduta Eltziararako bidea eta ate irekiak ekintzarekin baitan Eltzia Topaguneko hainbat lokal ezagutzeko aukera izan zuten ondoren. "Potx eta Lotxen laguntzarekin jende asko erakarri genuen Eltziara eta han dauden taldeak ezagutzera emateko Ate irekiak ekitaldiarekin ekin genion egitarauari Eltzian dauden hainbat talderen lokalak bisitatu eta euren jarduna bertatik bertara ikusteko", azaldu du Eltzia Eguneko antolatzaile taldeko kide Sara Arregik.
Bazkaria, bertso saioa eta kontzertua
85 lagun elkartu ziren elkarrekin bazkaltzeko gero topalekuan. "Giro ederra izan genuen eta bazkal ostean Urko Arregirekin eta Beñat Ormaetxearekin bertso saioa eta bingo saioa egin genituen, giro oso onean eta eguna borobiltzeko, Aiert Alberdik kontzertu ederra eskaini zuen Peru Arrese Arrasateko bateria-jolea lagun. Orokorrean, atzoko egunaren balorazio positiboa egin dugu Eltzia Eguna modu onean berreskuratu dugulakoan".
