Urriaren 15ean egingo dute Aloña Mendiko mendi sailak antolatutako hurrengo irteera. Oñatiko mugarriak ezagutzeko ekimenaren barruan antolatutakoa izango da, helburu horrekin aurten egingo duten azken aurrekoa.
Arantzazutik aterako dira, errekaraino jaitsiz. Etengabe igotzen hasiko dira gero, Artasotik, goiko lepora heldu arte. Behin mugan, Urkilla mendilerrotik jarraituko dute San Millan, Barrundia eta Aretxabaletako mugak zeharkatuz. Aumategitik Degurixara jaitsiko dira eta handik Araotzera.
Hemezortzi kilometro dituen ibilaldia da, zazpi bat ordu inguruan egiteko modukoa, 1.000 metroko desnibelarekin; 08:00etan aterako dira postetxeko autobus geltokitik. Hilaren 12 da izena emateko azken eguna, Aloña tabernan edo mezua helbide honetara bidalita: alonamendi.mendi@gmail.com. Bazkideendako prezioa da: 10 euro. Derrigorrezkoa da federatuta egotea.