SPG50 gaixotasuna duten adingabekoei laguntzeko musika hiru kontzertu egingo dituzte Oñatin datozen egunetan Fundacion Columbus-ek antolatutako RenHacer jaialdian. San Martin egoitzan egingo dutena izango da lehendabizikoa, eguenean. Txelo eta akordeoi emanaldia egingo dute han, 17:30ean, Angel Luis Quintana eta Jesús Mozo musikariek. Bost pieza joko dituzte: Manuel de Falla-ren Siete Canciones Populares, A. Piazzolla-ren Ave Maria eta Adiós Nonino, C. Alvim-en Sambaroque eta Euskal kanta herrikoa. Egoitzako egoiliarrendako eta euren senideendako izango da.
Zapatuan, bestalde, beste bi kontzertu egongo dira Arantzazun. San Martin egoitzan joko duen Angel Lusi Quintanak eskainiko du matinee-a, 12:00etan, kriptan. Iluntzekoan, berriz, 19:00etan, Euskadiko Orkestrak eta Donostiako orfeoiak parte hartuko dute, Ramon Tebar-ek zuzenduta –Maria Jose Montien mezzo eta Miren Urbieta soprano–. Mahler-en bigarren sinfonia interpretatuko dute.
Saiakuntza kliniko baterako
Columbus Fundazioa da RenHacer edo Ongintzazko jaialdiaren antolatzaile nagusia eta Oñatiko Udalak lagunduta eskainiko dituzte Oñatiko hiru kontzertu hauek. 2017an sortu zen fundazio hori eta gaixotasun arraroak dituzten haurren kalitatea hobetzeko eta tratamenduak behar dituzten pertsona guztiek eskuragarri izan ditzaten lortzeko egiten du lana.
Gipuzkoan ongintzako hainbat kontzertu egingo dira aste honetan, Arantzazun ez ezik baita Donostiako Kursaalen ere, adibidez, eta bilduko den dirua, Gipuzkoan SPG50 gaixotasun arraroaren inguruko abangoardiako saiakuntza kliniko bat egiteko izango da.
