22:00etan hasi zuten proba, euritan. "21:30ean itxi genuen ibilbidea eta 21:25ean euria hasi zuen. Beraz, sikuan eta azkar egiten den proba arrisku eta arazo gehiago izatera pasa zen", azaldu du Iñigo Idigorasek, antolakuntza taldeko kideak. Horren ondorioz, eroriko batzuk ere egon ziren. "Berotzen dagoeneko batzuk lurretik bueltaka ibili ziren eta lasterketan bertan ere bai, bereziki Portu kalean eta Kale Zaharrean, ibilbide aldaketaren lekuan. Dena dela, balorazio positiboa egiten dugu", gaineratu du.
Euriak euri, Oñatiko kaleak bete egin ziren eta horri ere balioa eman diote antolatzaileek. "Proba polita izaten da, herritarrentzat atsegina ikusteko, eta ikusi da kaleak bete egin zituztela herritarrek", nabarmendu du Idigorasek.
Lasterketari dagokionez, gizonezkoen sailkapenean Javi Mateos sevillarra izan zen nagusi (00:40:04) eta iaz proba irabazi zuen Mikel Olalde oñatiarrak bigarren postuarekin konformatu behar izan zuen (00:40:08). Gerard Saltor bartzelonarra sartu zen hirugarren helmugan (00:40:10).
Aurtengo berrikuntza emakumezkoen sailkapena izan da eta bost emakumek hartu dute parte. Barcelona taldeko Sanjhoy Beltran, Maria Orrego eta Wendy Dayan Patiño izan ziren hiru onenak, nahiz eta ez zuten proba bukatzerik izan. Izan ere, araudiaren arabera, hamabost itzuli zituen probak eta lehenengoek doblatu ezkero, lasterketatik kanporatuta geratzen ziren ziklistak.
Bost emakumezko lasterketan egon izana positiboki baloratu dute antolatzaileek, nahiz eta datozen ekitaldietara begira "landu beharreko puntu" bat izango dela aitortu, "egonkortu dadin".
