Uztailaren 2an pasako da Frantziako txirrindularitza lasterketa Oñatitik, eta Mikel Lizarraldek eta konpainiak Tourra herrian ikusteko gonbidapena egin dute: festa antolatu dute. Dagoeneko lotuta dituzte festa-gunea eta kanpalekua muntatzeko eremuak: Udana mendatearen hasieran, Aldabeko bidegurutzean, dagoen zelaian jarriko dituzte sukaldea, taberna eta karpak; Aiastui baserri aurreko zelaian lo egiteko kanpalekua egokituko dute eta Aldabe baserri ondoko beste eremu batean autokarabana eta furgonetendako tokia prestatuko dute.
Bezperan, uztailaren 1ean, herriko plazatik Olabarrietako festa-gunera 18:00etan egingo den bizikleta martxarekin hasiko da festa. Behin gunera helduta, trikitilariak eta bertsolariak egongo dira eta afaria antolatzen hasiko dira. Domekan, gosaria, hamarretakoa eta bazkaria egingo dituzte. Festara joan gura duenak izena eman behar du Lizarralde Kirolak dendan, edo 943 78 29 86 telefono-zenbakira deituta. Prezioa: 70 euro; hamazazpitik beherakoek, 30 euro.
