Oñatiko Natur Eskolako atzean dagoen egurrezko hormak su hartu du arratsaldeko 19:30ak inguruan. Orduan udaltzainek eta suhiltzaileek abisua jaso dutela esan du Asier Iraeta Udaleko Ingurumen zinegotziak.
Udaltzainak izan dira lehenak Natur Eskolara iristen eta eurak hasi dira lehenengo sua itzaltzen su-itzalgailuekin. Ondoren, suhiltzaileak iritsi dira laguntzera eta sua guztiz itzaltzea lortu dute. Ertzaintza ere bertaratu da.
Lurretik hasi da sua gorantza igotzen eta Iraetaren esanetan "lau edo bost metro zabaleran" eta "lehenengo pisuraino" iritsi da sutea. Kanpoko egurrezko horma izan da erre dena, eta, Ingurumen Zinegotziak adierazi duenez "zorionez" ez da barrura iritsi adreiluzko pareta delako barrukoa. Iraetak esan duenez "susto" batean gelditu da dena.
Oraindik argitu gabe dago sua zerk eragin duen.
