Aurten ere beteko du Ganbara Faktoriak bazkideei kontzertua eskaintzeko ohitura. Zapatuan izango da, Santa Anan, 19:00etan. Bazkideei banatu dizkiete gonbidapenak baina kontzertua herritar guztiendako da eta sarrerak salgai daude ohiko tokietan, zorti eurotan.
Bi modu eskaintzen ditu Ganbara Faktoriak ekimeneko bazkide egiteko: Ganbara laguna –15 euro urtean– edo bazkide –50 euro urtean–, eta aukera bakoitzak bere abantaila propioak ditu. Egun 118 bazkide ditu guztira –28 lagun eta 90 bazkide– eta datozen bi urtetan 150era igotzea du helburu taldeak. Oñatiko Udala eta Ulma kooperatiba ohorezko bazkideak dira eta enpresa gehiago sartzea ere bada beste helburu bat.
2023rako proiektu asko ditu Ganbara Faktoriak
Zapatuko kontzertuaren ondoren, beste hainbat etorriko dira ekainean. Adibidez, Debagoieneko Haur eta Gazteen II. topaketa egingo dute Oñatin ekainaren 3an; 17an, 'Oñatiko iturriak' izeneko ikuskizuna egingo dute Bidaurretan eta 18an, emanaldia egingo du Aequus Ensemble orkestak San Migel parrokian.
2023an zehar egingo dituzten ekitaldietako batzuk dira horiek. Izan ere, proiektu asko dituzte urtea bukatu bitartean egiteko. Batzun aipatzearren: Ganbara abesbatzak Zinemaldian hartuko du parte, lehendabiziko aldiz, Euskadiko oskestarekin batera filmei musika jarriz eta Hots abesbatzak nazioarteko lehiaketa batean hartuko du parte estreinekoz.
Eta 2024a buruan du dagoeneko Ganbara Faktoriak, urteurren urtea izango delako. Ganbara abesbatzak 30 urte beteko ditu eta Kantu Eskolak 20.
