Gaur, eguena, 18:30ean, egingo dute apirileko ohiko osoko bilkura eta hor egingo dituzte maiatzaren 28an hauteskunde mahaietan egon beharko duten herritarrak izendatzeko zozketak. Zozketa egiteko datak apirilaren 29tik maiatzaren 3ra arteko egunak baziren ere, Bergarako hauteskunde batzordeak baimena eman du zozketa aurreratzeko, jakinarazpenak ahalik eta bizkorren heltzeko. Horrela, Oñatin, gaur, apirilak 27, egingo dituzte.
Guztira hamabost mahai daude eta lau hautesleku: Zubikoa kiroldegia (7), Santa Marina plazako ikastetxea (4), Bidaurreta dorrea (2) eta Olakuako haur eskola (2). Mahai bakoitzean lehendakari bat, 2 bokal eta dagozkion ordezkoak izendatuko dira (gutxienez 9 mahai bakoitzeko eta ordezko gehiago alegazioak suertatzen badira).
Izendatuak izan diren herritarrek bihartik aurrera jasoko dute jakinarazpena.
