Erramu-domeka da gaur, Eliza Katolikoaren egutegian egun esanguratsua. Eta Oñatiko San Migel parrokian, hasiera batean berezia dirudien meza nagusia izan dute: astoa sartu da bertan, eta katekesian dabiltzan neska-mutikoak dantzan ere ibili dira. Azkar zabaldu dira sare sozialetan horiek jasotzen dituzten bideoak.
"Hilean behin, katekesian dabilen umeen meza familiekin egiten dugu eta aspaldiko ohitura da neska-mutiko horiek Erramu-domekako mezan parte hartzea. Astoa ere ekartzen da baserri batetik; gaur, euriagatik, ezin izan dugu parrokiara kanpotik ekarri, baina klaustroan eman dugu buelta bat", azaldu du Oñatiko parroko Horazio Argaratek.
Jesus Jerusalemen sartu zen eguna
Argaratek berak gidatu ditu neska-mutikoak Jerusalema dantzatzeko orduan: "Erramu-domekan ospatzen dena da Jesus Jerusalemera sartu zela. Azkenaldian, pandemia garaian, Jersualema kantua oso ezaguna egin da medikuek, azafatek eta hainbat kolektibok egindako bideoengatik, eta guk ere egitea erabaki dugu".
Mezako bideoak sare sozialetan izaten ari diren oihartzunaz jakitun, ez dio aparteko garrantzirik eman Oñatiko parrokoari: "Batzuei gustatuko zaie, beste batzuei ez, baina nire partetik ez dago zabaltzeko arazorik".
