Duatletek hasiera eguzkitsua izan duten arren, berehala iritsi dira euri zaparrada mardulak eta haizea, eta horrek asko zaildu du lasterketa. Gizonezkoetan, Peñota Dental Alusigma taldeko hiru duatletak osatu dute podiuma eta Joanes Goitisolo izan da denetan azkarrena (1:54:43).
Aimar Murua taldekidearekin egin du ia lasterketa osoa gernikarrak. "Hasieratik Aimarrekin adostu dut elkarri laguntzea eta azkenera arte horrela izan da. Gero, hitz egin dugu bizkorrenak irabaz zezala, eta ni iritsi naiz lehenengo helmugara", azaldu du.
Trantsizioan hainbat arazo izan dituela onartu du Goitisolok. "Zirkulazio arazoak ditut eskuetan eta hanketan eta hotz handia egiten duen egunetan asko kostatzen zait atzamarretan ukimena izatea. Hori dela eta, momentu batean ezin izan dut kaskoa kendu, eta larritu ere egin naiz. 25 bat segundo galdu ditut eta horren amorrazioarekin-edo, lehenengo kilometroa oso azkar egin eta Aimar harrapatu dut. Ikusi dut erritmo aldaketarik ez zeukala eta nik nirea mantendu ezkero ezingo zidala jarraitu, eta hala izan da". Aitor San Vicente taldekidea izan da hirugarren sailkatua.
Emakumezkoetan, faboritoa nagusi
Emakumezkoetan, Yepa! Triatloi Klubeko Helene Alberdi faboritoak ez die aukerarik eman aurkariei eta hark irabazi du aurtengoan ere (2:11:57). "Agian kanpotik erraz ikusi da, baina nik behintzat asko sufritu dut", nabarmendu du. "Ibilbidean zehar askotan gurutzatzen gara eta ni ere erreferentziak hartzen joan naiz. Hasieran tartea zabaldu dudan arren, ez da inoiz tarte handia izan eta banekien ezin nuela hanka altxa; une oro estutu behar izan dut. Beraz, sufritutako garaipena izan da".
Enara Oronoz izan da atzetik jarraika izan duena eta garaipena lortzerik izan ez badu ere, lasterketa borobila egin du Saltoki Trikideak taldeko lasterkariak. Halaber, podiumeko hirugarren koxkatxora Besaide Astobiza igo da.
Sailkapenak
Emakumezkoak
- Helene Alberdi (2:11:57).
- Enara Oronoz (+01'25").
- Besaide Astobiza (+10'24").
Gizonezkoak
- Joanes Goitisolo (1:54:43).
- Aimar Murua (+00'31").
- Aitor San Vicente (+00'51").
Egokitua
- Alfonso Perez.
- Joseba Azkarate.
Oharra: bihar, domeka, informazio osatua eta argazki guztiak egongo dira ikusgai. Etzi, astelehena, gaurko duatloiak emandako guztia, 'Harmailatik' saioan.
