Bigarrenez aurkeztu da Fernandez PSE-EEren Oñatiko zerrendaren buru, eta sozialistek udalean galdutako ordezkaritza "berreskuratzeko" lan egiteko konpromisoa hartu du. Oñati "eraldatzeko" asmoa agertu du prentsa-ohar bidez, eta gaineratu, "proposamen zehatz eta egingarriak" dituela etorkizuneko erronkei "eraginkortasunez aurre egiteko". Herri gisa "gehiago merezi" dutela oñatiarrek uste du eta azpimarratu "aniztasuna, bizikidetza eta egonkortasuna" bermatzen dituztela sozialistek.
Artearen historian lizentziaduna da Fernandez eta Gasteizko Michelin lantegian dihardu lanean. Mendoza (Araba) eta Oñati artean bizi da eta "udalerriaren errealitatearekin oso konektatuta" jarraitzen duela adierazi du.
