Turkian eta Sirian lurrikarak astindu dituen lurraldeetako herritarrei bidaltzeko manta eta arropa bilketa kanpaina antolatu zuen Hotz Oñatik aste honetarako. Kiroldegian jarri zuten kaxa eta astelehenetik zapatura bitartean egitea zen asmoa, baina orain arte jasotako arropa guztia sailkatuta, gehiagorekin ezin dutela ikusi dute eta etetea erabaki. Beraz, gaur, eguaztena, izango da azken eguna mantak eta arropak biltzeko. "Ikaragarria izan da herritarren erantzuna. Laupabost aldiz joan gara egunero kiroldegian batuta zegoena jasotzera. Asko jaso dugu. Kaxetan sartzen hasita gaude, gainera, gure asmoa astelehenean bertan bidaltzea da-eta. Baina konturatu gara ezin dugula gehiago kudeatu eta etetea erabaki dugu. Esker oneko hitzak besterik ez ditugu herritarrendako. Mila esker denoi, beste behin", Hotz Oñatikoen mezua.
Janari bilketa egingo dutela ere iragarrita zuten, eta hori, baina, mantentzen da. Egubakoitzean, hilak 17, egingo da hori herriko supermerkatu ezberdinetan: Kooperatiba, Eroski Arantzazu, Eroski Errekalde eta Super BM. Batu gura dutena da: arrain-kontserbak, barazki eta lekale kontserbak –txerrikirik gabe–, arroza, pasta, esnea eta gailetak. Zaporeak Gobernuz Kanpoko Erakundearen bitartez bideratuko dute jasotako janari kopurua.
