Jakinekoa zen Aloña Mendiko eskubaloiko gazte mailako kadete eta gazteek Euskal Ligan jokatuko dutela datorren urtean. Baina, aurtengoa borobiltzea falta zen, izan ere, denboraldi amaierara arte Euskal Ligan jokatu nahi zuten bi talde horiek. Horretarako promozio fase bana gainditu behar zuten, kadeteek joan den astean jokatu zuten fase hori –Berangon– eta lehenengo sailkatu ziren, eta oraingo asteburuan gazte mailakoen txanda izan da, Oñabike Aloña Mendiren txanda. Eta horiek ere lortu dute helburua.
Oñatiarrek gotorleku bilakatu dute Zubikoa. Harmailak jendez beteta, egubakoitzean berdindu egin zuten Berango Urdulizen kontra (25-25), zapatuan Errotaberri mendean hartu zuten (22-29), eta gaurko partidu erabakigarrian ez dute hutsik egin, horrenbeste zaleren aurrean jokatzearen urduritasuna menperatu eta Mikel Agirreren taldeak ondo irabazi dio San Adrian taldeari (34-18). Gaurko partiduaren laburpena astelehenean, Harmailatik saioan (21:30).