Udaltzaingoaren arabera, argindarra joan denean izan da kalean erorikoren bat edo beste –herritar batek orkatila apurtu du– eta, horrez gain, igogailuetan harrapatuta ere geratu da beste herritarren bat. "Ordubetean kaos handia izan dugu herrian; gertaerari jarraipena egingo diogu datozen orduetan".
Hainbat auzotan, hala nola, San Martin, Ugarkalde edota Olabarrieta, denbora luzeagoan egon dira argi barik, baina 21:00etan "arazoa konpondu" dela jakinarazi du Izaro Elorza Oñatiko alkateak, Twitter bidez. Alkateak azaldu duenez, hiru lineatako batean gertatu da matxura, eta horrek, sare guztiak bota ditu. Arazoa konpontzeko transformazio zentroak banaka konektatu dituzte, matxura duena isolatzeko. Hala, bi orduren buruan herri guztira itzuli da argia.