"Herri proiektua indartzeko eta doitzeko" prozesuarekin jarraitzen du EH Bilduk eta lan-saio irekiak egingo ditu urtarrilean eta otsailean, "ekintza-plana marrazteko". Saio horien helburua izango da "diagnostikoa oinarri hartuta ekintza-planerako erronkak identifikatzen hastea". Koalizioaren bilgunean izango dira saioak, Kale Barrian, eta herritar guztiendako izango dira.
Saio bakoitzean gai bat jorratuko dute. Adibidez, urtarrilaren 16an, hurrengo astelehenean, izango da lehen jardunaldia eta kultura izango dute hizpide. Otsailaren 1era bitartean, berdintasuna, kirola, sozioekonomia, euskara, lurralde antolaketa, hezkuntza eta gazteria landuko dituzte.
Joan den maiatzean abiatu zuen prozesua EH Bilduk. Azarora bitartean, aurreko urteetako balantzea eta diagnostikoa egin zuen, eta orduan hori aurkeztu herri batzarrean, ekarpen gehiago jasotzeko tailerrarekin batera. Orain, gaiak jorratzeko lan-saio irekiak egingo ditu.
Agendan dago sartuta lan-saioen egutegia.
