Mondragon Korporazioak gradu eta master amaierako lanak saritzeko lehen edizioa antolatu du, eta bihar egingo dute ekitaldia, Arantzazulaben. Izan ere, nabarmendu dute Mondragonek "eraldaketa berritzailea, jasangarria eta pertsonetan oinarritutakoa sustatzea" duela helburu, eta horretarako "ezinbestekoa" dela "gazteriaren talentua". Horregatik, uste dute eraldaketa jasangarria proposatzen duten ikasleen lanak saritu beharra dagoela.
Guztira, 29 unibertsitatetatik jasotako 260 lan aurkeztu dituzte. Tartean dira, Euskal Herriko Unibertsitateko, Mondragon Unibertsitateko eta Deustuko Unibertsitateko ikasleak, baina baita nazioartekoak ere: Espainiako 24 unibertsitate, eta Suitzako eta Italiako bana.
Sarien banaketa
Sari banaketari dagokionez, hiru kategoria izango dira: eraldaketa digitalean, adimen artifizialean, automatizazioan eta robotikan, 99 lan aurkeztu dituzte; pertsonetan oinarritutako eraldaketan, berriz, 91. Hain justu, talentua, aniztasuna eta robotika dira horren parte diren hiru arloak; eta azkenik, eraldaketa energetiko-klimatikoan, 70 lan daude sarietarako. Kategoria bakoitzean bi sari banatuko dituzte. Irabazleak, 2.500 euro jasoko ditu, eta finalistaren saria irabazten duenak, berriz, 1.250 euro.
Ekitaldia 11:00etan hasiko da, eta online jarraitzeko aukera ere egongo da https://vimeo.com/event/2705358 helbidean.