Oñatiko gaztetxe mugimenduak 40 urte bete ditu aurten eta hamar beteko ditu abenduan Antixenak, eta urteurren biak bateratu eta orain arteko ibilbide horri aitortza egin gura dion fikziozko filma estreinatuko dute abenduaren 8an herriko zinema aretoan. Antixenan sortutako eta hainbat herritarrek, zein debagoiendarrek, parte hartu duten proiektua da, izan zuzendaritzan, antzezpenetan zein lan teknikoetan.
2032an kokatzen da
Ixilik nahi gaituztenean, Mari du izena filmak eta drama distopiko bat da. 2032an kokatzen da. Udalak bidalitako gutuna jasotzen dute gaztetxean, utzi egin behar dutela esanez, eta gatazkak hasten zaizkio pilatzen bertako kide den Mariri (Paula Polo): gatazkak udalarekin izateaz gain, asanbladako beste kide batzuekin zein senideekin ere sortuko zaizkio. Horixe da filmaren abiapuntua.
Duela urtebete hasi ziren gidoia idazten eta proiektuari forma ematen eta uztailean egin zituzten grabazio gehienak. Gaztetxean, Antixena parkean, Boga Tabernan, Olaitturrin, eta Ibarrondo liburu-dendan grabatu zituzten eszenak, besteak beste.
Herritar multzoa proiektuan
Filmak 45 minutu ditu eta lau lagunen artean zuzendu dute: Anjel Lera, Jone Markuleta, Xanti Ugarte eta Mikel Garai. Euren artean banatu dituzte gidoia idazteko lana, produkzioa edo lan teknikoaren ardura. Aktore lanetan ibili diren herritarren artean daude, esaterako: Paula Polo (Oñati), Amaia Castañeda (Oñati), Mariasun Pagoaga (Arrasate), Egoitz Aizpuru (Oñati), Mikel Sagarzazu (Oñati), Danel Teran (Oñati), Izar Mendiola (Oñati), Jone Markuleta (Oñati) eta Ibai Elorza (Oñati).
Teknikarien artean, berriz: Sofia Morales argiztapenean, Oier Yaniz bigarren kamera, Mikel Letamendi soinua eta Eñaut Zubizarreta AKA Tigger musika.
Bestalde, kredituetan irudi eta argazki historikoekin egindako muntaia Eñaut Uri esalgok egin du. Gontzal Belategi da kartelaren egilea eta Xabi Rezabal argazkiena.
Proiekzioak
Asteburu honetan Oñatin eskainiko dute filma. Durangoko azokan egubakoitzean erakutsiko dute eta asmoa dute urtarriletik aurrera Euskal Herri osoko hainbat gaztetxetan ere eskaintzeko.
- Abenduak 7: aurre estreinaldia proiektuan modu batera edo bestera parte hartu duten herritar multzoarendako eta ostean luncha. Antixena gaztetxean
- Abenduak 8: zinema aretoan, 19:00etan
- Abenduak 9: Durangoko azokan, Irudienea gunean, 18:30ean
- Abenduak 9k: Santa Ana antzokian, 22:00etan
- Abenduak 10 eta 11: Santa Ana antzokian, 19:00etan
