Hilabetez, urriaren 17tik, egon da itxita Oñatiko San Migel parrokia sitsak eragindako kalteak konpontzeko lanak egiteko –lur zoruan, Unibertsitatera ematen duen atean, eserlekuetan eta aitorlekuetan–. Bukatu dituzte. Eliza garbitzen ari dira egunotan eta zapatuan zabalduko dute. Zapatutik aurrera parrokian egingo dituzte hango ohiko elizkizunak, hiletak barne.
Lanak egin bitartean Agustindarren elizan egin dituzte parrokiako elizkizunak eta ondo moldatu direla adierazi du Horazio Argarate parrokoak. Bi hileta handietan estutasunen bat izan dutela, baina gainerakoan arazorik ez.
Parrokiako lanen inguruan, bigarren fase baterako gelditu ziren organoa eta erretaula tratatzeko lanak, horietan ere kalteak sortu ditu-eta pipiak. Argaratek baieztatu du organoaren aurrekontua egitera etorri direla Aldunditik, noiz konponduko duten ez dakien arren. Ezta erretaulakoak ere.