Oñatiko Garibai auzoan duen planta handitu egingo du Fagor Professionalek. Bada, 2023an hasiko da eraikitze fasea, eta 11.000 metro karratuko azalera izango du azpiegitura berriak. Horrek, besteak beste, aukera eskainiko du kooperatibaren plantek Foodservice-aren -Oñatiko Santxolopeztegi auzoko lantegia- eta Garbigailuen -Garibai auzoko lantegia- sektoreen espezializazioan sakondu dezaten. Orotara, 16,5 milioi euro inguruko inbertsioa eskatuko du azpiegitura berriak, eta, aurreikuspenen arabera, 2024an bukatuko dira lanak.
"Etorkizuneko erronkei behar moduan heldu nahian harturiko erabakia da. Garibai auzoko plantaren kapazitatea bikoizteak eragin zuzena izango du ekoizpenean. Eta lanpostu berriak sorraraziko ditu. Hori oso berri pozgarria da Oñatirentzat, eta, oro har, Debagoien osoarentzat", azaldu du Patxi Azpiazu Echevarriak, Onnera Group-Fagor Professionaleko lehendakariak. Finean, azken urteotan, goraka doa kooperatibak garbigailuen sektorean duen eskaera, eta, horrek ekoizpena handitu beharra dakarkio.
Efizientzia, erdigunean
Iraunkortasunari loturik hartuak dituen konpromisoak oinarri, Fagor Professionalek erdigunean du jarria planta berriaren eta bertan ekoitziko diren produktuen efizientzia: ingurumenari begira, biak ala biak, beren sektorean, munduko efizienteenak lirateke. Besteak beste, punta-puntako sistemak izango dituzte energia- eta ur-kontsumoaren kudeaketarako.
