Gaur, egubakoitza, eta bihar, zapatuan, herriko janari dendetan –Super BM, San Miguel kooperatiba, Eroski Center, Eroski Errekalde eta Errekaldeko denda–egongo dira Hotz Oñatiko boluntarioak herritarrei poltsak eta informazioa banatzen. Lekaleak, kontserbak, olioa, pixoihalak, konpresak, irina, arroza edo pasta jasoko dute. Bildutakoa, Zaporeak eta Errefuxiatuen Red Sos elkarteei emango diote, Lesbosen eta Atenasen banatzeko. Aurreko bilketetan bezala, garaje baten pilatuko dute jasotakoa eta asmoa da datorren astean bidaltzea kamioia. Bergarako Mariaren Lagundia ikastetxean batu dituzten produktuak ere Oñatira ekarriko dituzte hemen batutakoarekin batera bidaltzeko; bost ikasle ere etorriko dira bilketan laguntzera.
Produktu horiez gain, barra energetikoak ere eskatuko dituzte Hotz Oñatiko kideek, Aita Mari itsasontzikoendako.
