Amei entzun egin behar zaiela iritzita, amatasunaren hamahiru esperientzia jaso dituzte M ama eme ume liburuan Estitxu Fernandezek eta Erika Lagomak. "Ikusi genuen amatasunaren esperientzia desberdinak ezagutzeko beharra zegoela, amei entzun egin behar zaiela. Durangoko jardunaldi feministetan berretsi genuen behar hori. Han egindako tailerrean ondorioztatu genuen amatasuna, instituzio moduan, zein itogarria eta zurruna den, eta sistemak oraindik hori dela nahi duena: umea izan eta etxera zokoratu edo umea izan eta berriro lanera bidali produzitzera. Konturatu gara ama gehienok ez gaudela ez batean ez bestean. Eta guk gura dugu gure beharrak eta umearenak betetzea", dio Estitxu Fernandezek.
Emakumeen Jabetze Eskolaren barruan gonbidatu ditu Fernandez eta Lagoma Udaleko Berdintasun sailak. 18:00etan izango da aurkezpena eta ondoren solasaldia, zinema aretoan.
