Helburua da herriko kultura eta hizkuntza desberdinak aintzat hartzea eta elkar ezagutzea, betiere euskara eta euskal kultura ardatz izanik. Hezkuntza zinegotzi Alaitz Kortabarriak proiektuaren indarra eta balioa nabarmendu ditu aurkezpenean eta ekimenean bene-benetan sinisten dutela adierazi du. Auzoko-n perfil desberdineko pertsonek har dezakete parte: batetik daude Auzotarrak (euskara menperatzen duten pertsonak) eta, bestetik, Auzokideak (euskara ez dakiten edo oso ongi menperatzen ez dutenak). Elkarrekin, joko eta dinamika desberdinen bitartez, parte hartzaileak euskarara hurbiltzea da asmoa.
Hilabeteroko dinamikak egingo dituzte. Hala, gai desberdin bat landuko dute hilabete bakoitzean. Herriko eragileekin elkarlanean proiektuak ere garatuko dituzte.