Ikamak (Ikasleria Martxan) Debagoieneko Ikasle Eguna iragarri du biharko, eta Oñatiko Antixena gaztetxea izango da topaketa horren elkargunea. Egun osoko egitaraua iragarri dute.
Hitzaldi batekin emango diote hasiera, 11:00etan, eta 12:30erako triki-poteoa iragarri dute. Ondoren, 14:30ean, bazkaria egingo dute gazteek, eta Gaiztokeria tailerrarekin luzatuko dute bazkalostea. Arratsaldean musika izango da protagonista. 18:30ean, Züttik elektrotxarangak girotuko du Debagoieneko Ikasle Eguna, eta hiru emanaldirekin osatutako kontzertuak hartuko du ondoren lekukoa. Buru Gabe, Larru Beltzak eta Virgin Mari DJ arituko dira kontzertu horretan. "Ikasturte berrian ere ikasleok antolatzen eta borrokatzen jarraituko dugu! Batu zaitez zu ere! Gurea euskal eskola herritar eta burujabea!", adierazi dute.