Kanpaina honetarako Udalak aurreikusita zituen 15.000 euroei udaberrikoan agortu gabeko 4.768 euroak batuko zaizkie. Hori horrela, guztira, 19.768 euroko aurrekontua izango du udazkeneko kanpainak.
Aurrekoan legez, Oñatin erroldatutako 16 urtetik gorako herritarrendako dira, eta pertsona bakoitzak 50 euro arteko muga izango du %20ko deskontua duten bonuak erosteko. Bonuak oñati.bonoak.eus webgunean sartuta edo atxikitutako komertzioetan –43, oraingoz– eskura daitezke. Azaroaren 30era arte eros daitezke, aurrekontua lehenago agortzen ez bada. Erabiltzeko azken eguna, berriz, abenduaren 2a izango da.
Udalak emandako datuaren arabera, udaberriko kanpainan 1.118 herritarrek erosi zituzten bonuak, eta 70.902,83 euroko salmentak sustatu.
