Hiru bikote horiez gain, Gandal eta Juli Bayot –Castello– eta Mendi eta Jabier Zubiaurre –Mutriku, Gipuzkoa– sailkatu dira bigarren ariketarako, hamahiru parte-hartzaileen artean.
Lehen ariketaren ostean zortzi punturen barruan zeuden lehenengo bostak. 175ekin, Mendi eta Zubiaurre zihoazen aurrena, baina bigarren ariketan ez dute artealdea eskortan sartzea lortu, eta bosgarren posturaino jausi dira sailkapenean.
Xecok eta Miguel Adroverrek, berriz, laugarren postuan eta lehenekiko bost puntuko desabantailarekin ekin diote bigarren ariketari, baina lan bikaina egin eta lehen posturaino egin dute salto.
Amaieran, pozez txoratzen zegoen artzain irabazlea: "Txapelketa hau irabaztea urte askoan izan dudan ilusioa da. Iritsi da eguna, eta oso pozik nago. Beti esan izan dut: 'Oñatiko txapelketa irabaziz gero, hiltzeko ere gertu'; orain ez nuke nahi gertatzerik, baina, egia esan, artzain ororen ilusioa da hemen irabaztea".
Txakurrak egindako lanarekin oso pozik zegoen irabazlea: "Akats bakarra egin du, 50etik gora agindu emanda, oso lan ona egin du".