Zorionak Zea Mays taldeari!

Aiora Renteria abeslariak gidatzen duen laukotea udaberria ezkero ari da Zea Maysen mende laurdeneko biran buru-belarri murgilduta; eta atzo, egubakoitza, Oñatiko Foruen Plaza bete zuten ikusleekin batera gozatu ederra hartu zuten ibilbideko askotariko kantuekin osatutako errepertorio borobila eskainita.

23:15etan igo zen laukotea agertokira, ordurako zain zituzten zaleak, askotarikoak, profil eta adinari begiratuta, orokorrean, baina, emakume heldu asko publikoan. Bozgorailuetako Foo Fighters taldearen doinuei lekukoa hartuta, 2013an argitaratutako Da bildumako Gaur kantuarekin indartsu ekin zion Bilboko taldeak. Segidan etorri ziren Kuraia kantu berria eta abeslariak, teklatua lagun, eskaini zuen Atera (2019) diskoko Kea hunkigarria.

Diskotik diskora, saltoka

Bildumaz bilduma ale ezberdinak aukeratuta ordu eta laurdeneko emanaldi indartsua egin zuten, besteak beste, taldearen ikur diren Itsasoa, Elektizitatea, Enbata, Adore eta Negua joan da ta abestuta.

Kaxianoren 'Zorionak'

Oihu kantuarekin borobildu zuten kontzertuaren lehen zatia gauerdia pasata. taldekideak agertokitik jaitsi arren, ikusleak ez ziren euren tokietatik mugitu kantu gehiagoren gosez. Segituan igo ziren berriz ere, Kaxianoren Zorionak kantua lagun, eta cava botila eskuetan, taldearen 25 urteko ibilbidearen ospakizunetan murgilduz ikuslegoa. Amaiera borobila egin zuten Kukutza kantu ezagunarekin dantzan eta kantuan jarriz Foruen Plaza.

Publikoaren "harrera beroa"

Harreman polita sortu zen musikarien eta txaloekin eta kantuan laguntzen zuen publikoaren artean. Eta hala adierazi eta eskertu zuen abeslariak emanaldiaren bukaeran: "Eskerrik asko gau hotz honetan emandako berotasunagatik. Kontzertua hasteko hamar minutu falta zirela beldurrez geunden ikusle gutxi zeudelako, baina sekulako sorpresa hartu dugu segituan plaza bete egin denean eta oso eskertuta gaude jasotako harrerarekin".

Erlazionatuak

Zea Maysen 25 urteko ibilbidea, Oñatin ere ospatuta

Oñati

Zea Mays taldeak 25 urte bete ditu, eta atzo, egubakoitza, Oñatiko Foruen Plaza lepo bete zen Bilboko taldearen ibilbide luzeko askotariko k...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.