Elkartearen irudia izango den logotipoa egin gura du herriko Zai Zoi Bele musika kolektiboak, eta lehiaketa bidez egitea pentsatu du. Hilaren 27ra arte egongo da aukera lanak aurkezteko, eta ikusgai jarriko dituzte gero, jendeak iritzia, botoa, eman dezan.
Irailaren 27a, aurkezteko epea
Eltzian entseatzen duten herriko musika taldeek osatzen dute Zai Zoi Bele musika taldea, eta, logorik ez dutela konturatuta, bila hasi dira. Diote edozein formatutan –JPG, PDF zein eskuz– egindako lanak onartuko dituztela. Jartzen duten baldintza bakarra da taldearen izena agertzea: Zai Zoi Bele. Gainerako elementu guztiak –tamaina, kolorea, letra tipoa, marrazkia...– erabat libreak dira.
Irailaren 27a da ideiak bidaltzeko azken eguna. Posta elektronikoz zaizoibele.logo@gmail. com helbidera bidalita edo Irizar estankoan zein administrazioan entregatu daitezke. Jasotzen dituzten proposamen guztiak lehengo Kirrin dendaren erakusleihoan jarriko dituzte ikusgai, herritarrek euren gustukoa aukeratzeko. QR kode bidez eman ahal izango da botoa. Irailaren 28tik urriaren 2ra arte egongo dira ikusgai eta egun horretan, Errosarixo domekan, Atzeko kalean iluntzean egingo den kontzertuan egingo dute sari banaketa. Hiru sari emango dituzte: 150, 100 eta 50 eurokoak.
29 musika taldek osatzen dute
Egun, 29 musika taldek osatzen dute Zai Zoi Bele kolektiboa, eta itxarote-zerrendan dago 30. taldea. Eltzian dauden hamar lokaletan egiten dituzte entseguak eta tokia eta ordutegia egokitzean sartuko da talde berria; orain arte hurbildutako talde edo norbanako guztiek izan dute tokia.
Zortzi lagunek osatzen dute bi urtean behin berritzen den zuzendaritza taldea, baina guztien artean kudeatzen dituzte entsegu lokalak eta ordutegiak. 2016ko martxoan erregistratu zuten izena, eta 122 musikari inguru daude kolektiboan. Kolektiboaren irudia lortu gura dute orain, webgunean, sare sozialetan eta bidaltzen dituzten mezuetan erabiltzeko.
Dibertsioetarako prestatzen
Herriko jai nagusien barruan, Errosarixo biharamun egunean txosnagunean egiten den Dibertsioak emanaldian ere ikusgai jarriko dute logoa. Indartsu datorren hitzordua, nonbait, hamahiru bat talde buru-belarri ari dira-eta dagoeneko kontzertu horietan joko dituzten kantuak entseatzen.
