Azkoagain futbol zelaiko lanak bukatu artean, Aloña Mendik Antzuolan jokatuko ditu etxeko partidak. Hori dela eta, ohorezko erregional mailako taldearen partidak ikustea dohainik izango dela adierazi du Aloña Mendi KEk.
Domeka honetan –irailak 18– 16:30etan jokatuko du Aloña Mendik etxean lehen partida, Hernaniren aurka. Taldeak etxetik kanpo Aretxabaletan lortu zuen garaipenaren bidetik jarraitu nahi du, denboraldi hasierako sentsazio onak berresteko.
Antzuola Kirol Elkartekoek hainbat zozketa egingo dituzte partiduan zehar. Lortutako etekina Antzuola Elkartekoek jasoko dute.
Bide batez, Aloña Mendi KEk esker ona adierazi nahi izan die Antzuola KEko ordezkari guztiei, Eztala futbol zelaian entrenatu eta jokatzeko eman dizkieten erraztasun guztiengatik.
Bazkide txartelak banatzen
Bestetik, Aloña Mendi Kirol Elkartetik bazkide txartelak ari dira banatzen etxerik etxe eta posta arruntez. Norbaitek txartela jasotzen ez badu, zuzendaritzako batzordeko kideekin harremanetan jartzeko eskatu dute.
