Hartutako erabakiak berraztertzeko –eta langileak berriz onartzeko– eskatu zioten sindikatuko ordezkariek zuzendaritzari atzo egindako elkarretaratzean. Langileen iritziz, enpresak jarritako arrazoiak ez dira "sinesgarriak": "Ordezkariok ez dugu ulertzen, ezta sinesten ere, enpresak ematen duen justifikazioa. Erabaki horrek erakusten du oso arreta gutxi jartzen dutela egunero gure onena arduraz eta profesionaltasunez ematen dugun langileengan".
Bestetik, sindikatuak salatu du langileek ez dutela inoiz zigorrik jaso ezta beraien espedientean akats edo kargu-hartzerik izan: "Langile onak dira, hainbat hamarkada daramatzate enpresa honetan lanean (...) Oso gizatasun gutxi erakutsi du zuzendaritzak; ez baitie axola zein egoera ekonomikotan uzten dituzten pertsonak eta familiak".
Bukatzeko, kaleratzeak "neurrigabekoak" direla esan dute. "Zergatik ez daude prest beste neurri batzuk negoziatzeko? Benetan uste dugu bi lankideren soldatak fabrika salbatuko duela? Non daude azken urteetako onura metatuak?", galdetu dute langileek.