Unibertsitate zentroaren ESTU Enpresa Laguntzaile bihurtu da ULMA izenpetu berri duten hitzarmenaren bidez. Akordioak lau urteko iraupena izango du, eta beste lau urtera arte luzatu ahal izango da, bi aldeak ados badaude.
Talentu bila
Iñaki Gabilondo ULMA taldeko zuzendari nagusiak azpimarratu du, akordioak frogatzen duela bi enpresek duten konpromisoa "talentua bilatzearekin, erakartzearekin eta atxikitzearekin". Gainera, talentua etorkizunean "euskal enpresek duten erronka handienetako bat" izango dela aurreikusten du Gabilondok.
Bestalde, Xabier Ostolaza Gipuzkoako Ingeniaritza Eskolako (UPV/EHU) zuzendariak nabarmendu du hitzarmenak "balio erantsia" emango diola ikasleen prestakuntzari. "Digitalizazioaren erronka hain da erabakigarria, guztion artean egin behar diogula aurre, betiere lankidetza-espiritu batetik abiatuta, eta hitzarmen honek bi erakundeen arteko sinergiak erraztuko ditu", esan du Ostolazak.
Konpromisoak
Hartutako konpromisoei dagokienez, zehaztu dute ULMAk bere gain hartuko duela ikasleentzat ordaindutako praktikak eta gradu amaierako lanak errazteko ardura. Asmoa dago, halaber, prestakuntza ikastaro espezializatuak emateko eta ikasleen bisitak antolatzeko taldeko enpresen instalazioetara. Gainera, ULMAk konpromisoa hartzen du MotoStudent nazioarteko lehiaketan parte hartzen duen eGIPUZKOA GIE-UPV/EHU taldearen finantzaketan laguntzeko. Bertan, mundu osoko unibertsitate ikasle taldeek Moto3ko kategoria mundialistaren antzeko lehiaketa baterako motozikleta baten prototipo bat diseinatzeko eta garatzeko erronkari aurre egin beharko diote.
Horrez gain, Gipuzkoako Ingeniaritza Eskolak, besteak beste, bere instalazioetan ikasleentzat interesekoak diren jardunaldi bateratuak antolatzeko konpromisoa hartzen du, bai eta ULMA Taldeko enpresetara ikasleen bisitak antolatzeko ere. Gainera, bere hedabideetan ULMA Taldeko enpresei buruzko informazioa erakutsiko du, eta ikasleei ULMAk eskainitako praktikei, gradu edo master amaierako lanei buruzko informazioa emango die, dagokion unean.
