Etxegarai eta Oses Udako Laboral Kutxa Torneoan arituko dira

Jon Irizar Aranguren 2022ko uzt. 11a, 16:46
Etxegarai –ezkerretik lehena– eta Oses –eskuinetik lehena–, txapelketaren aurkezpen agerraldian. (Argazkia: Laboral Kutxa)

Emakume Master Cup urte osoko txapelketatik eratorrita, udako torneoa antolatu du Laboral Kutxak. Parte hartuko duten zortzi pilotarietatik bi oñatiarrak izango dira: Maddalen Etxegarai Zelaia eta Uxue Oses Egaña. Egubakoitz honetatik aurrera, lau bikoteek elkarren aurka neurtuko dituzte indarrak. Abuztuaren 27an izango da finala, Zumaian.

"Herri eta auzo guztietatik ari dira deitzen neskei euren frontoietan jokatzeko, baina konpromiso puntual ugari hauetaz gain, goi mailako txapelketa arautu batez gozatzeko aukera ere izango dute". Hala adierazi dute Laboral Kutxako arduradunek gaur goizean egindako aurkezpen agerraldian; Udako Laboral Kutxa Torneoaren aurkezpen agerraldian, hain zuzen.

Zortzi pilotari arituko dira, bikoteka, txapelketa berri honetan. Eta tartean, bi oñatiar: Maddalen Etxegarai Zelaia eta Uxue Oses Egaña. Egubakoitz honetatik aurrera, ligaxka formatuan jokatuko da lehen fasea; elkarren aurka jokatuko dute, ondorioz, bailarako bi pilotariek. Binakako Emakume Master Cup txapelketan egungo txapeldunak direnak izango dituzte bikotekide; Enara Gaminde laukiztarra izango du kide Etxegaraik, eta Oses, berriz, Olatz Arrizabalaga gernikarrarekin arituko da. Hona bi oñatiarren egutegia:

  • Uztailak 15, egubakoitza - Haro (Errioxa): Etxegarai-Gaminde Aldai-Capellanen aurka, eta Arrizabalaga-Oses Garai-Erasunen aurka.
  • Uztailak 24, domeka - Lekeitio (Bizkaia): Arrizabalaga-Oses Aldai Capellanen aurka, eta Etxegarai-Gaminde Garai-Erasunen aurka.
  • Abuztuak 3, eguaztena - Labastida (Araba): Etxegarai-Gaminde Arrizabalaga-Osesen aurka.

Finala, Zumaian

Finalerdiak egongo direla aintzat hartuta, lau bikoteek jokatuko dute bigarren fase hau. Hondarribian izango da, abuztuaren 13an, eta bertan erabakiko dira hilaren 27an Zumaiako Aitzuri pilotalekuan txapelaren bila lehiatuko diren bi bikoteak. Zuzenean emango du finala EITBk.

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak