"Oso pozik gaude Provenzan egindako lanarekin". Hala adierazi dio Goienari Aitor Biain Bidarte Ganbara Abesbatzako zuzendariak. Eguenean egin zuten Okztaniako Bandol herrixkara bidaia, autobusez; astelehen arratsaldean helduko dira Oñatira. "Bost egun trinko" izan direla adierazi du Biainek, hiru egunetan txapelketak zituen sei kategorietatik lautan abestu baitute oñatiarrek. Hala ere, egindako esfortzuak "merezi izan du" zuzendariaren hitzetan.
Hiru kontinentetako 36 abesbatza aritu dira nor baino nor gehiago; europarrak ziren lehiakide gehienak, baina baziren Indonesiako, Estatu Batuetako zein Arabiar Emirerri Batuetako koruak ere. "Maila altuko lehiaketa izan da" Biainen hitzetan, "puntuazio altuak" egon baitira, baita "interpretazioen musika kalitate ezin hobea" ere. Epaimahaiaren balorazioa ere azpimarratu nahi izan du oñatiarrak.
Hainbat sari
Koru misto kategorian, ahots taldean, eta sakro zein folklore modalitateetan hartu dute parte Ganbarako kideek. Bigarren izan ziren lehenean, hirugarren bigarrenean, eta laugarren postuekin konformatu behar izan zuten azken bietan. Bi sari, beraz, parte hartu duten lau kategorietan.
Kantutik harago
Asteburu luzea, baina, lehia eta puntuetatik harago joan da. Izan ere, "izugarrizko beroa" izan duten arren, hondartzaz eta bertako gastronomiaz "gozatzeko" aukera izan dute. Eta talde giroa sendotzeko zein etorkizunera begira indarrak batzeko ere baliagarria izan da Provenzako esperientzia: "Taldea oso pozik eta motibatuta dator etorkizuneko proiektuei aurre egiteko: hamabostaldia, Bermeoko musika zikloa...".