Kalean 2022 egitarauaren barruan ohikoa den moduan, aurten ere Hots eta Ganbara abesbatzek euren ohiko agertokietatik kanpo eskainiko dute ikuskizun bat. Aurtengoa Santa Lutziako zuhaiztian izango da bihar, egubakoitza, 22:00etan, eta bi abesbatzetako zuzendari Aitor Biainek adierazi du eurendako saio "berezia" izaten dela honako hau: "Gure udako kontzertua izaten da, berezia, gainera; batez ere, gure ohiko aretoetatik edota elizetatik ateratzen gaituelako eta kanpoan, aire librean, abesten dugulako. Urtero leku berezi bat aukeratzen dugu eta horra eramaten dugu gure musika; aurten, Santa Lutzian izango gara".
Natura protagonista
Basoaren hotsa izena darama kontzertuak. "Oraingoan, baso baten barruan zer entzuten den kontatu gura dugu, eta herritarrak basoko soinuak entzutera gonbidatu nahi ditugu. Gainera, publikoan izango diren aulkien artean bozgorailuak ere izango ditugu eta horietatik basoko hotsak entzungo dira; txorien kantuak, esaterako", adierazi du Biainek.
Lehenengoak abesten Hots abesbatzakoak izango dira, eta abesti guztiek izango dute lotura naturarekin. "Ura, sua, airea eta lur elementuen kantak interpretatuko ditugu, baita lainoei, tximeletei edo lore dantzei buruzkoak ere", azaldu du Biainek. Ondoren, Ganbarakoen txanda izango da; haiek ere abestuko dituzte naturarekin zerikusia duten kantuak eta aprobetxat ko dute baita ere datorren asteburuan Frantzian lehiatuko diren lehiaketan interpretatuko dituzten kantu batzuk egiteko. Izan ere, Proventzako nazioarteko lehiaketan hartuko dute parte, Bandol herrian –Marseilla eta Toulon artean dagoen kostako hirian–. Azkenik, gaurko saioan, bi abesbatzek batera ere abestuko dute. Guztira, 80 minutu inguru iraungo du eta kontzertura joateko ez da sarrerarik eskuratu beharko.
Goienan zuzenean
Abao komunikazio agentziako lantaldea izango da zuzenekoa jasotzen eta Goiena telebistak eta Goiena.eus-ek zuzenean eskainiko dute kontzertua bihar, egubakoitza, 22:00etan.
'Frontona' antzezlana
Kalean 2022-ren baitan, eguaztenean, 19:00etan, Frontona antzerkia egingo du Arteola taldeak plazako frontoian. Josu Artutxa, Andoni Egaña, Iñigo Otaegi, Anne Maiza, Unai Ormaetxea eta Janire San Sebastian dira bertako kideak.
