86.000 euroko dirulaguntza kultur proiektuak gauzatzeko

Larru Beltzak taldeak, esaterako, iaz jaso zuen laguntza. (Argazkia: Axiber Palacin).

Udaleko Kultura Sailak bideratu du kultur programak eta sormen lanak aurrera eraman ahal izateko dirulaguntza deialdia. Interesa dutenek eskaerak maiatzaren 23ra bitartean aurkeztu ahal izango dituzte.

Dirulaguntza deialdi bat egin du Udaleko Kultura Departamentuak, eta bertan bi laguntza-lerro zehaztu dituzte: alde batetik, kultur proiektuak eta programak gauzatzeko 70.000 euroko diru poltsa izango da; eta bestetik, Oñatin, irabazi asmorik gabeko taldeek garatuko dituzten kultur sormen lanak egiteko 16.000 euroko beste poltsa bat jarri dute.

Dirulaguntza horien eskatzaileek dagokien eskaera-orri orokorrari proposatutako ekintza edo ekintzei buruzko fitxak erantsi beharko dizkiote. Baita nortasun agiriaren kopia edota identifikazio fiskalaren kodearen kopia ere. Eskariak baloratzerakoan, proposatutako programaren ezaugarriak, eskaera egin duen erakundearen ibilbidea eta ezaugarriak eta dituen finantza baliabideak hartuko dituzte kontuan.

Eskaerak Udalaren erregistro elektronikoan aurkez daitezke, modu telematikoan, edo HAZ bulegoan –aurretik txanda hartuta–, maiatzaren 23ra bitartean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.