Gipuzkoako Orientazio Taldeko kideek antolatuta egin dute proba Oñatin, San Migel jaien barruan. Eta, antolatzaileak gustura geratu dira emaitzarekin: "Arduratuta egon gara, ea mapa ondo zegoen, ea aukeratutako lekuak eta ibilbideak egokiak ziren, balizak, informatika kontuak... Baina bai, jendea pozik geratu da eta ez zaigu inor haserre etorri, horrenbestez, oso pozik geratu gara", adierazi du Asier Osinagak proba amaieran. Izan ere, leku askotatik etorritako koadrila polita batu da Oñatin: "Egia da nagusien mailan Urbasan ere beste orientazio proba bat antolatu dutela, eta beste batzuk hara joan dira. Urbasa, gainera, paradisua da halako probetarako, baina asko dira Oñatira etorri direnak".
Eskola kirolaren baitan maila txikietako 130 neska-mutikok hartu dute esku orientazio proban, gehienak binaka ibili dira eta nagusien mailan 100 lagunek hartu dute esku. "Familien kategoria ere bazegoen, guztira 10-12 familiek hartu dute esku".