"Urrutira joan gabe naturaz eta kultur ondareaz gozatu nahi duten gipuzkoarrentzat bete-beteko egitaraua prestatu dute Gipuzkoako Parketxeetan". Hala adierazi zuen, behinik-behin, prentsa ohar bidez Gipuzkoako Foru Aldundiak. Probintziako sei parketxeetan –Zegamako Anduetza, Ataungo Barandiaran eta Lizarrusti, Aiako Iturraran, Oiartzungo Arditurri eta Oñatiko Arantzazu– "herritar guztiei" zuzendutako aukerak prestatu dituzte Aste Santurako eta Pazko asterako.
Hiru ekimen
Arantzazuko Parketxeko eskaintzari erreparatuta, hiru izango dira "natura ingurunearen ezagutza bultzatzeko eta ingurumenarekiko errespetuzko balioak sustatzeko" egingo diren ekintzak.
Lehena, bihar bertan. Arantzazutik Gomiztegira ibilbide irisgarrian barrena joan ostean, Gaztagintzaren sekretuak jarduera egingo da artzain eskolan bertan. Bigarrena, apirilaren 30ean. Mikel Olanok gidatuta, txorien kantuak ezagutzeko ibilaldia egingo da Aizkorri-Aratz parke naturalean zehar. Eta hirugarrena parketxean bertan egongo den haginei buruzko Life Baccata erakusketa da.
Izen-ematea
Hamaika dira gainerako bost parketxeetan egingo diren jarduerak; hona egitarau osoa. Ekintza guztietarako ezinbestekoa da izena ematea; parketxeetara bertara deituta edo www.gipuzkoanatura.eus webgunearen bidez egin liteke.
