Ilusio handiz dago gaurko kontzerturako Idoia Asurmendi aramaioarra: "Gogoratzen dut duela urtebete inguru Oñatiko gaztetxean egon ginela Ilun eta abar diskoa aurkezten, kaleratu eta egun batzuetara. Ederra izan zen, jende ugari izan zelako, eta pozgarria da niretzat ziklo hau Oñatin amaitzea. Urtebetean gauza asko pasa dira; proiektua asko hazi da, 50 kontzertu inguru eman ditugu ordutik, eta Madrilera eta Zaragozara goaz hil bukaeran, baina Euskal Herrian kontzertuen bira Oñatin bukatuko dugu, etxetik [Aramaio] oso gertu, eta Oñati niretzat ere etxea bezalakoa da, momentu asko pasa ditudalako bertan".
Diskoko kantuez gain, berri batzuk ere joko dituzte. "Lehen diskoko kantuak joko ditugu eta berriren batzuk ere bai; izan ere, hasi gara kantu berriak sortzen. Argiek garrantzi handia dute ikuskizunean, eta poesiarekin ere lotzen den kontzertu bat izango da", adierazi du artistak. Agertokian alboan izango du banda: Joanes Ederra – baxuan eta kontrabaxuan–, Ander Ederra –gitarretan–, Nacho Soto –teklatuan– eta Karlos Arancegui –baterian–. Kontzertua bihar, egubakoitza, 20:00etan hasiko da, gaztelekuan.
Olatz Salbador, 24an
Etzi, zapatua, Arrasaten izango den Olatz Salvador artista donostiarrak ere eskainiko du kontzertua gaztelekuan hilabete honetan. Hilaren 24an izango da hori, eta matinee kontzertua izango denez, 12:30ean hasiko da. Sarrerak dagoeneko ohiko lekuetan eros daitezke, Idoia Asurmendiren kontzerturako bezala, 8 euroren truke.
