Zubikoa kiroldegiko Bizittu gimnasioan Pello Uriarte monitorea egoten da, erabiltzaileen kezkak argitu eta behar dutenei aholkuak emateko prest. "Monitore egoten naiz gimnasioan eta nire helburua da etortzen diren erabiltzaileei erakustea era seguruan makinak nola erabili, hona etorri eta eremu ezagun batean senti daitezen, gustura ibiltzeko", zehaztu du Uriartek. Orain, gainera, ikastaro batzuk eskaintzen ere hasi dira hilero, zapatu goiz batean, erabiltzaileei gimnasioari lotutako askotariko argibideak eskaintzeko.
Makinen funtzionamendua
Martxoko azken zapatuan, esaterako, gimnasioan dauden makinen funtzionamenduari buruzko saioa eskaini zuen Uriartek. "Bi jarduera fisiko mota banatuko genituzke gimnasioan, jarduera fisiko aerobikoa izango litzatekeena landuko genuke; esaterako, bizikleta estatikoan edo eliptikoan eta korrika egiteko zintetan. Eta barruko zonan gelditzen diren makinak izango lirateke indar lana egitekoak eta muskuluak gogor mantentzekoak. Bigarren eremu horretan sortzen dira zalantza gehien. Gustatzen zaigu garrantzia ematea posturari, teknika egoki bat erabiltzeari. Helburua da bizimodu osasuntsua bultzatzea eta gauzak era egokian egitea", azaldu du Uriartek, eta gaineratu du ikastaroan izan ziren erabiltzaileek gustura entzun zituztela argibideak.
Planifikazioaren garrantzia
Etzi, zapatua, eskainiko dute hurrengo ikastaroa, eta hori lehenengoaren jarraipena izango dela azpimarratu du monitoreak. Izan ere, lehenengoan, makinen funtzionamenduari buruzko xehetasunak ikasi zituzten, eta oraingoan, fitness gelako saio baten planifikazioa nola egin irakatsiko die. "Asmoa da jarraitzea aurreko saioko dinamikarekin. Oraingoan, azpimarratuko dugu, lehenik eta behin, berotzeak daukan garrantzia, eta, horren ostean, poliki-poliki zein makina erabiliz joatea komeni den. Makina bakoitzarekin muskulu zehatz batzuk lantzen dira, eta komeni da guztia kontuan hartzea". Tonu muskularrak galtzeak lesioak, oreka falta, erorikoak eta bizkarreko minak ekar ditzakeenez, besteak beste, gimnasioan egindako ariketekin helburua izango litzateke horiek guztiak saihestea, bizimodu osasuntsua eramanda.
Ikastaroa 09:30ean izango da eta izena eman beharko da kiroldegiko harreran edota monitoreari jakinarazita.
