Tetraplegia izanda halako errendimendua erakusteak harridura sortu du adituengan.
Duatloiak, normalean, paraplegia dutenek egiten dute, eskuetan mugikortasun osoa dutenek. Nire kasuan, denbora luzeagoa behar izaten dut aulki batetik bestera aldatzeko, eta lasterketak amaitzeko beste lehiakide batek baino hiru aldiz gehiago entrenatu beharra daukat.
Kategoria berri bat sortu nahian zabiltzate.
Oraindik ez dago-eta ni bezala gaudenondako mailarik. Kalifikatzaileek esaten digute beharrak sortuko duela kategoria. Ederra litzateke edozein tetraplegikok duatloi edo triatloi batean parte hartu dezakeela ikustea.
"Etxetik kalera, kirola egitera" baitiozue sarritan.
Hori da zabaldu nahi dugun mezua. Osasuna hobetu edo kirolean parte hartu nahi dutenei laguntzeko gaude gu. Lasterketetan ikusten gaituzte, eta badakite klubeko atea zabalik dutela. Beraiei dagokie erabakiak hartzea; izan ere, norberaren arazo eta ezgaitasunak oso desberdinak dira, eta gu zuzenean beraiengana joanda, agian, kalte egin dezakegu, edo atzera bota. Nire aldetik, esan dezakedana da oreka, indarra eta arnasketa zeharo hobetu ditudala Antxintxikan entrenatzen hasi nintzenetik.
