Bideo eta guzti publikatu du Youtuben Keia taldeak lehenengo aurrerapen kanta, Ez zara zu izenekoa. 2021eko apirilean sortu zuten taldea distantzian, izan ere, bakoitza bere etxean lantzen hasi zen Ane Arruti musikari zarauztarrak aspalditik idatzita zeuzkan kantuak, eta ekainean hasi ziren lokalean elkartu eta entseguak egiten.
Arrutik gidatuta eta bere kantuak oinarri hartuta, hirukote oñatiar sendoaren babesa dauka ondoan, Latzen, Potemkin, Sharon Stoner, Sorkun, Zingira, Lenao edo Amonal taldeetan aritutako musikariak baititu lagun. Egoitz Olalde baterian, Iñigo Ibarrondo baxuan eta Iker Martinez de Zuazo gitarran.
Diskoa Beran, Atala estudioan, Iñigo Irazokirekin grabatu dute modu analogikoan. Arrutik azpimarratu du horrek soinu aldetik "berezi" egiten dituela kantuak eta otsaila hasieran argitaratuko dute hamar abestiz osatuta egongo den lehen diskoa.
Egubakoitzean, Bonberenean
Hilaren 14an, egubakoitza, estreinatuko da oholtza gainean Keia taldea. Tolosako Bonberenean izango da hori, 22:00etan.