Kontrako botoa eman zion EAJ-k EH Bilduk aurkeztutako aurrekontuei eta horren arrazoia "EH Bilduk duen konpromiso falta" izan dela dio komunikabideetara bidalitako prentsa oharrean. Dio beraiek egindako 19 emendakinetatik bakarra onartu zutela, 15.000 eurokoa: "Aurkeztutako zuzenketa askori EH Bilduk emandako erantzuna izan da aurrekontuetan aurreikusita dauden beste partida batzuekin egingo direla. Ez da legealdi honetan erantzun hau jaso dugun aurreneko aldia izan, eta ikusi ahal izan dugun moduan, ez da nahikoa. Aurrekontuetan idatziz islatzen ez bada, ez dago EH Bilduren konpromiso irmorik; hau da, gure proposamen horiek ez dira gauzatzen".
Gaineratu dute euren proposamenak inbertsioetarako dagoen diruaren %17a dela, gutxi gorabehera. Udal Gobernuan dagoen taldeak "aurrekontu itxia" aurkeztu duela diote eta jeltzaleek euren proposamenak finantzatzeko aukerak planteatu dituzten arren, EH Bilduk ez duela "borondate politikorik".
Boto emaileen %40aren aukera izan direla ere gogorarazi dute eta "Oñatiren eta oñatiarren beharrei erantzuten" jarraituko dutela.
